Caras Amigas, cars Amics,

Coma President de l’Associacion Internacionala d’Estudis Occitans (AIEO), vos fau la benvenguda sus aquestas paginas novèlas dedicadas al IX Congrès de l’associacion, que se tendrà a Aquisgran en 2008, en tot esperar de la vos tornar faire de viva votz l’an que ven dins la vila de Carlesmanhe.

Per aqueles que coneisson pas l’AIEO, resumissi en qualques mots son activitat. L’AIEO es una associacion scientifica que son objectiu es la promocion dels estudis occitans dins l’ensems de las disciplinas de las sciéncias umanas e socialas; se fondèt en 1981 a Lièja e acampa, entre unes 450 aderents dins lo mond entièr, los universitaris trabalhant dins aquelas disciplinas e de cercaires e operators non universitaris obrant dins los meteisses domenis. L’AIEO ten cada tres ans de grands congrèsses internacionals, que lo noven se debanarà tot bèl just a l’Universitat d’Aquisgran del 24 al 31 d’agost de 2008.

Lo tèma del Congrès pertòca lo “bilanç” e las “amiras” de la recèrca occitana dempuèi 25 ans de vida de l’AIEO. L’estudi de la lenga e de la literatura d’òc es de considerar demest las recèrcas que, al començament del sègle XIX, presidiguèron a la naissença de las sciéncias modèrnas de la literatura en Alemanha e en França; mas, uèi encara, manifèsta una vitalitat bèla e una difusion ben pus larga. Dempuèi sa fondacion, la preséncia de l’AIEO e de sos aderents dins aquel grand movement d’estudis es estada remarcabla e constanta e a contribuit d’alargar l’interès per la civilizacion occitana anciana e modèrna. Doncas nos es paregut que lo temps èra vengut de cercar de dreiçar un bilanç del trabalh complit e de presentar las amiras de las recèrcas futuras.

L’internacionalitat dels estudis occitans es un caractèr aquerit dempuèi lor fondacion: aquel aspècte si que s’es revelat dins los congrèsses precedents de l’AIEO e mancarà pas de se manifestar al congrès venent d’Aquisgran, al còr d’una region de longa istòria e uèi al mitan de grands procèsses politics que tòcan l’Euròpa entièra. Dins aquela region, la vila d’Aquisgran representa una causida benastruga coma sèti de nòstre Congrès. Vila de Carlesmanhe e en aquel temps centre renovelat de poder e de saber, a l’intrant de l’istòria europèa nòva e seguent la fin del mond antic, Aquisgran es pr’amor d’aquò una vila simbòl de nòstra cultura e de son vam civilizaire.

En esperant de vos reveire nombroses a Aquisgran, vos desiri bon trabalh e vos adreici mas melhoras saludacions.

Walter Meliga

President de l’AIEO